أول مرة شادي يصلي من زمان .. سجد سجدة طويلة .. أول مرة يبكي في السجود .. أحس براحة نفسية عجيبة .. أول مرة يحس بالشعور ده في الصلاة .. في المرات القليلة اللي كان بيصلي فيها كان بيأدي حركات روتينية كده مافيهاش روح .. وعمره ما حس بالخشوع في الصلاة زي النهارده .. أول مرة ياخد باله من حكاية الأعضاء اللي بتكره المعاصي .. والملايكة .. أول مرة يفكر يعني إيه إنه اتولد مسلم .. وربنا عايز منه إيه .. عمره ما فكر في الموضوع ده قبل كده
روح البيت وهو مرتاح و حاسس إنه طاير .. لازم ينام شوية عشان مسافر رحلة للأقصر وأسوان مع الكلية .. النوم جاله بسهولة معه إنه دايما كان يسهر وما يعرفش ينام بدري
سافر شادي مع شلته .. راحوا أماكن كتير .. بس هو لقى رجليه بتاخده لأماكن لوحده .. دخل معبد من المعابد .. بهره جمال المباني والألوان والنقوش الفرعونية .. مد إيده يلمس صورة من الصور .. فجأة لقى الحيطة بتتحرك وباب بينفتح .. ويدخل مكان غريب .. التفت وراه لقى الباب اتقفل .. حاول يفتح الباب ما قدرش .. مشي لقدام شوية .. سمع أصوات غريبة .. وحركة ناس كتير .. شوية ولقى موكب كبير ماشي قدامه وحراس الملك ماشيين قدام الموكب .. لابسين زي اللي بيشوفهم في الصور .. بيعملوا إيه دول ؟؟ .. بيصوروا فيلم عن الفراعنة ؟؟ طلع الكاميرا عشان يصور .. الفلاش ضرب .. الناس أخدوا بالهم منه .. الحرس جريوا عليه .. اتسمر مكانه و مش عارف يروح فين
في لحظة اتلفوا حواليه وأخدوه معاهم للكبير بتاعهم .. وبدأ يحقق معاه
كبير الحراس – إنت مين يا بني .. واسمك إيه ؟؟
شادي – أنا شا- دي
كبير الحراس – شا- دي ؟؟ يعني إيه ؟؟ وإيه اللبس الغريب ده ؟؟ إنت منين ؟؟
- من القاهرة
- القاهرة ؟؟ دي فين دي .. احبسوه دلوقت .. لغاية ما الصلاة تخلص .. بعد الصلاة نشوف إيه حكايته
شادي مش فاهم حاجة .. هو الناس دول فراعنة بجد وللا إيه ؟؟ .. وإزاي فجأة كده دخل في زمن تاني .. حس كده إنه في المكان الغلط .. بس و ماله .. يصلي وبعدين يشوف الفيلم ده هيخلص على إيه
شادي – طب ممكن بس اتوضى ؟؟ .. التويلِت فين لو سمحت ؟؟
- تتوضى ؟؟ .. يعني إيه ده ؟؟
- أتوضى يعني .. هو انتو هنا بتصلوا من غير وضوء ؟
- بس بس بلاش كلام .. الصلاة هتبدأ
شادي لقى الملك الكبير بتاعهم واقف في مكان عالي .. شبه فرعون اللي في المتحف بس صحته أحسن شوية .. والآلاف حواليه .. قاعدين يسجدوا ويقولوا ترانيم كده وكلام هو مش فاهمه .. والفرعون قاعد يوزع عليهم بركاته .. وشوية عالم شكلهم نصابين كده قاعدين يلموا فلوس من الناس .. ويمسحوا على راسهم والناس تمشي
واحد منهم قرب من شادي
النصاب – إنت يابني ما بتصليش ليه .. إنت مش عارف إن اللي ما بيصليش هيروح النار ؟
شادي – أنا أصلي ما لحقتش أتوضى .. وبعدين لما تصلوا هاخش معاكم في الصلاة
- أمال إنت شايفنا بنعملوا إيه .. ما احنا بنصلوا اهه ..
- بتصلوا .. إزاي يعني .. إنتوا بتعبدوا الراجل ده
- راجل ؟؟ .. ده ربنا يا جدع انت .. هو مش مالي عينك وللا إيه ؟؟
شادي يقلق من اللي بيحصل .. بس يلاقي نفسه بيرد بشجاعة – ربكم ؟؟ .. ده إله ؟؟ .. إنت أكيد جرى لعقلك حاجة .. ما هو بني آدم زي و زيك أهه
النصاب – شششششششش .. اقفل بقك هتودينا في داهية
- أنا أعبد الراجل ده .. انت عايز تفهمني ان الناس دول كلهم كانوا بيصلوا له دلوقت
- أيوه .. إنت مش سامعه بيقول لهم أنا ربكم الأعلى .. وبتاع ؟؟
- طب والفلوس اللي كنتم بتلموها دي إيه ؟؟
- ما اهو احنا الكهنة بتوع المعبد .. و لازم يظبطنا عشان نظبط له الناس ويعبدوه كويس
- ويظبطكم من جيوبهم ؟؟ .. ما يظبطكم من جيبه .. لما هو ربكم الأعلى
- إنت باين عليك لَبَط ومش هتجيبها البر .. هتسجد له وللا لأ
- لأ
- طب تعالى معايا
ياخده لكبيرالحراس
كبير الحراس – إنت تاني ؟؟ .. عملت إيه المرة دي ؟؟
النصاب – مش عايز يسجد لفرعون
كبير الحراس يهمهم بينه وبين نفسه – والله الواد ده بيفهم .. هو ده منظر حد يعبده ده .. ده كان دفعتي .. وكان بيغش ف الامتحان .. بس الواسطة بقى .. بلد بنت .......
النصاب – نعم !! سيادتك بتقول حاجة يا فندم ؟؟
كبير الحراس – لا لأ .. تعالى هنا يا ولد .. مش عايز تسجد لفرعون ليه ؟؟
شادي – أنا مش باسجد إلا لله .. اللي خلقني وخلقك
- إيه .. بتعبد إله تاني غير اللي واقف هناك ده ؟
- أيوه .. وربنا مش هنا أصلا .. ربنا في السماء
- إيه الدين بتاعك ده ؟؟
- انا مسلم .. على دين سيدنا محمد
- والدين ده بيقول إيه ؟؟
احتار شادي .. كان نفسه يكون عارف في الدين شوية عشان يعرف يتكلم معاهم عن الإسلام .. بس للأسف معلوماته على قده
شادي – ده الدين اللي ربنا نزله على سيدنا محمد آخر نبي في الأنبياء
كبير الحراس يسأل الحرس بتوعه – مين الأنبياء دول ؟؟
واحد من الحراس يعمل سيرش في جوجل – أنبياء .. أنبياء .. فيه أنبياء كتير .. آه .. سيادتك يا فندم فيه سيدنا موسى سيادتك يا فندم .. هييجي سيادتك يا فندم بعد عشر سنين سيادتك يا فندم
شادي يفرح أوي إنه لقى حاجة يعرفها – أيوه .. سيدنا موسى .. ده اللي غلب فرعون ورماه في البحر .. صح ؟؟
كبير الحراس – إخرس خالص هتودينا ف داهية .. مين ده اللي يقدر يغلب فرعون ؟؟
شادي – هوه كده .. إحنا أخدناها كده في كتاب الدين
كبير الحراس – شوف يا بني انت تعبتني ومش فاهم منك حاجة .. هتسجد لفرعون وللا لأ ؟
- والله يا باشا أنا ما باسجدش غير لربنا .. وفرعون بتاعكم ده بصراحة يعني فاكِس
- يعني كل الناس اللي انت شايفهم دول غلط ؟؟ .. وانت يعني اللي صح ؟؟
- طبعا .. فيه حد برضه يعبد بني آدم زيه ؟؟ ..
- إنت شكلك كده متطرف .. وعايز تعمل بلبلة للرأي العام .. ولازم نقتلك قبل ما تنشر في البلد أفكارك الإرهابية دي
شادي لقاهم واخدينه على غرفة الإعدام .. أول مرة يحس بالخوف بالشكل ده .. بس قعد يشجع نفسه .. وحس بإحساس جميل أوي .. قد إيه نعمة ربنا عليه إنه هو الوحيد في وسط الناس دي كلها هو اللي يعرف ربنا .. حس إنه قريب من ربنا أوي .. نفسه يصرخ فيهم .. ياناس .. معقول بتعبدوا الراجل ده ومش عارفين ربنا .. معقول ..
شوية ودخل عليه الحرس ومعاهم السيوف عشان يقتلوه .. أحس بشجاعة غير عادية وهو بيواجههم لوحده .. بس حس إن ربنا معاه .. بيؤيده ويثبته ..
كبير الحرس – نفسك في إيه يا ولد قبل ما تموت
شادي – نفسي أصلي ركعتين
كبير الحرس - تصلي ركعتين ؟؟ .. هاتطول يعني ؟؟
شادي – لا مافيش .. عشر دقايق بس
- طب يللا صلي وخلصنا
- ممكن بس اتوضى
- ازاي يعني ؟؟
- عايز مكان فيه ميه
- خدوه الحمام .. بسرعة
الحرس ياخدوه .. يمشي معاهم وهو رافع راسه .. مش خايف منهم .. يفتحوا الباب .. يدخل .. يلاقي باب تاني .. معقول الحمامات عندهم محكمة أوي كده .. يلاقي باب .. يفتحه .. يلاقي نفسه على الترعة
شادي – إيه ده ؟؟ الترعة
- أيوه
- طب ولزومه إيه بقى باب جوه باب .. لما احنا في الآخر على الترعة
- يعني .. الشكليات .. انت عارف ان احنا في منطقة سياحية .. ولازم برضه يبقى شكلنا متحضر
شادي يتوضى ويرجع معاهم
يبدأ شادي يصلي آخر ركعتين في حياته .. الله أكبر .. يااااااااه .. أول مرة يحس فعلا يعني إيه الله أكبر .. أكبر من فرعون .. ومن الحرس ومن فرقة الإعدام .. أكبر من الدنيا كلها .. إحساس صعب أوي إنه خلاص هيفارق الدنيا .. بس الإحساس الأجمل إنه هيموت في سبيل الله .. لإنه رفض يسجد لغير الله .. مشاعر كتير مرت عليه في لحظات سريعة .. أحس بقوة الإيمان وهو في مواجهة الكفر .. وأجمل إحساس حس بيه إزاي إن ربنا مثبته ومطمنه .. وما عندوش استعداد يفكر ولو للحظة يسجد لفرعون .. سجد السجدة الأخيرة .. أحس إن ربنا بيكلمه وبيناديه .. كلا لا تطعه واسجد واقترب .. اقترب .. اقترب .. شادي حس في السجدة الأخيرة بأجمل لحظات القرب .. وفجأة سمع صوت عالي بيقول السلام عليكم ورحمة الله .. نط شادي من مكانه .. معقول فيه واحد مسلم هنا .. السلام عليكم ورحمة الله وبركاته ؟؟ معقول فيه حد هنا مسلم ؟؟
بص شادي حواليه .. لقى الإمام بيسلم من صلاته .. والناس بيبصوا له بحدة .. أتاري هو كان نايم في السجود وبيحلم .. الناس حواليه ماليين المسجد .. الله أكبر .. الله أكبر .. ده أنا لسه في الجامع .. في وسط المسلمين .. يااااااااه .. كان حلم رهيب .. الحمد لله على نعمة الإسلام .. الحمد لله إني في وسط المسلمين .. الحمد لله .. الحمد لله ..
