مانيش عايزة خلاص حاجة
ولا محتاج أنا لحاجة
ولو عايزة صحيح حاجة مخليتوليش ولا حاجة
عموماً بصوا فيه حاجة ...هقولها بس محتاجه عقول تفهم.. ولو حاجة
مهيش مفهومة او حاجة ....نفسرها بكام حاجة
نوضحها بكام حاجة وأهى حاجة مع حاجة هتظهر وتبان لنا حاجة
وانا ما بخفش من حاجة مانيش مسنودة ولا حاجة
لكن ما بخفش من حاجة
لكن فرضاً لو هقول حاجة هيحصل إيه ؟ ولا حاجة
هيعملوا إية ؟ ولا حاجة
وبعد الشر .. بعد الشر لو واحد من القاعدين من السامعين من الضالين فِهِم حاجة
هَيعملوا إيه ؟ اكيد برضُه ولا حاجة
فنتوكل على الستار لوجه الله نقول حاجة
فيه ناس بتعيش علشان حاجة و ناس بتموت علشان حاجة
و ناس بتموت على الحاجة
و ناس تديلك الحاجه وهى ليها محتاجه
و ناس تديلك الحاجه تاخد قدامها ميت حاجه
و ناس تكبر تكون حاجه و ناس تصغر علشان حاجه
و ناس منظر ومش حاجة و تلقاه كبير حرس ونفير عليه منظر
وهو جبان وشيخ منصر ولا يبـنش عليه حاجة
كلامى يا خلق فيه حاجة .. لحد دلوقتى فيه حاجه
كلام عادى و بسيط جداً .. ولا فِهشِ ولا حاجة
ما انا ما أقدرش أقول حاجه صحيح نفسى أقول حاجه
وميت حاجه لكن مش قادرة اقول حاجة لأنى لو هقول حاجه
هييجى ناس بتوع حاجه وياخدونى ورا الحاجة
وهو لو سمع حاجه هيعملوهالى ميت حاجه
عموما ... بصو لو حد من القاعدين عايزنى أبلغه بحاجة يقول مايخفش من حاجة
نعم .. فيه إيه؟ ...لالأ مافيش سرقه ولا تهليب ولا تهريب ولا حاجة
وبتقول إيه...مصمصوا إيه.... وخصخصوا إيه....ده كله كلام مفيش حاجه
قضية إيه ..ياشيخ روح خلاص مافيش حاجه
حرامى إيه ... و لكح إيه ... و هرب إيه؟ شــفـافـيـه مافيش حاجة
وبتقول إيه .. لالآلأ عـــيب لافيه تدليس ولاترقيص ولا تدبيس ولا حاجه
سمع مع هوووس انا حاسة انه فيه حاجة
دقيقة سكات لَتبقى حداد انا حاسة انه فيه حاجه
زمنكوا ياخلق فيه حاجه ولازموا كام و ميت حاجه
ده لو يعنى إذا كان فيه حاجة
انا عن نفسى مش حاسة ولا بحاجة ولا متضايقة و لا حاجة
سعادتك برضه مش زَيـىِ مافيش حاجة
أهـه بيقول مافيش حاجة جنابك برضه مش زَيـىِ وعلشان زَيـىِ مافيش حاجة
أهـه بيضحك بيقول مافيش حاجة
ما أنا قولتلكو من الأول مافيش حاجة
عليا النعمه يا اخوانّا مافيه حاجة
و رحمة ابويا ويّا أبوك على إللّى جابوك ما فيه حاجه
وعهد الله . وعهد الله. وعهد الله ما خللولنا ولا حاجه
بقولك إيه خـــلاص خلّص وفركش يلا اخوانا
مفيش حاجه
شعر سياسى عامى رائع
يارب يعجبكم للشاعره المتميزة إيمان بكرى
كلمات وفيديو وإلقاء رائعين
اللهم صلي وسلم وبارك عليك يا سيدي يا رسول الله
