دعوه للمناقشه تبادل الافكار

عايزه اتكلم معاكو في مواضيع كتير عايزه الاقي حد اتناقش معاه بجد عايزه نفتح قلبنا لبعض عايزه نبقي اخوات وصحاب بجد
لو ممكن نفتح باب المناقشه الحره مع بعض
في كام ليه وليه بتدور في بالنا ومش لاقين لها اجابه عايزه نكلم فيها بصراحه
اي حد عنده سؤال محيره هيكون كويس لو تبادلنا الاراء فيه واتكلمنا فيه بصراحه
ده هيكون مفيد لينا اكتر نتعرف علي الراي والراي الاخر

اول ليه؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
عايزه اعرف ليه احنا دايما لما نفكر نكتب نكتب عن الحزن
ليه لما الواحد يجي يكلم عن نفسه يطلع نفسه ملاك وبريء
ليه دايما بيقول انا مش لاقي وانا مش عارف الاقي حد يقدرني
ليه لما حد يسيء لينا مبنفتكرلوش الا الحاجه الوحشه بس
وبننسي اي حاجه حلوه عملها فينا
هل تعبيرنا عن الحزن ده جحود مننا ولا ايه
تيجي تسال الواحد عامل ايه يقولك كويس بس......
اهي لازم بس دي يعني لازم يشكي من حاجه للناس
لازم يدعي المرض يدعي الفقر يدعي التعاسه
ليه لما حد يسالنا عن راينا فيه منقلش الحق
ليه المجاملات الفارغه بين الناس
ليه اتعودنا نكدب عن نسنا ونخدعها
امتي هنكون صرحا مع نفسنا امتي بس
------------------------------------------------------------------
اتمني اني مكنتش ازعجت حد باسالتي بس كنت عايزه اعرف حجات كتير بتدور فبالنا وبنفكر فيها ومش بنلاقيلها اجابه انا فتحت باب المناقشه بينا واتمني نفيد بعض والي عنده تساؤلات يعرضها وناقشها مع بعض

اول حاجة حابب احيكى على الفكرة و تانى حاجة اسمحيلى استغرب ان محدش رد على الموضوع ....... عادى بتحصل فى احسن المواضيع .... ما علينا .... فى فعلا ملايين ليه بتجرى فى دماغنا و تعبانا ....

بالنسبة للـ ليهات اللى قولتيهم :
1- اول ليه .. لما بنفكر نكتب بنكتب عن الحزن لان الفرح كلنا بنقدر نعبر عنه فى لحظته بمليون طريقة بضحك و هزار و تنطيط و زغاريط ... بصرخة فرح ... بكلمة حلوة ... بتبادل تهانى ... لكن الحزن للاسف مش كلنا بنعرف نعبر عنه علشان كده بيفضل جوانا ساكن فينا ... فلما بنيجى ندور جوانا نلاقى الحاجة اللى معرفناش نخرجها فى لحظتها .. و كانها فضلت علشان نفضل نعبر عنها طول عمرنا ... كل ما نفتش جوانا -- كمان لان الفرح بيشاركك فيه كل الناس لكن وقت الحزن بتبقى لوحدك ... علشان كده لما بتقعد تانى لوحدك و تدور على اللى جواك تلاقى الحاجة اللى كنت فيها لوحدك هى اللى بتطلع على طول ... و كمان حاجة اننا بنضحك على نفسنا و بنضحك قدام الناس حتى فى جراحنا ... فمش معقولة نضحك على نفسنا كمان و احنا لوحدنا ...

2- تانى ليه .. بنطلع نفسنا ملائكة مع ان عنرنا ما هنبقى ملائكة ... بس دى طبيعتنا ... كل واحد فى الدنيا بيحب يظهر باجمل ما فيه ... زى لما بنقابل الناس باجمل لبس عندنا .. بنحاول برضه نقابلهم باجمل صفات عندنا ...

3- تالت ليه .. دى بقى حلوه اوى ... انا عايز كل واحد بيقول كده و انا اولهم يسال نفسه و انت بتقدر مين ... لاقى انت بس حد تقدره و شوف كام واحد هيقدر ... كل ما تحس ان سؤالك فى اتهام لغيرك و خصوصا لكل الغير يعنى مش شخص معين .. اسال نفسك نفس السؤال و وجه اتهامك لنفسك الاول ... و شوف ردك ..!!!!!

4- رابع ليه ... مش عارف ليه ... بس متاكد ان ده بيحصل ... فعلا بمجرد ان حد يهاجمك ( حتى لو مش اساءة ) مجرد انه انتقدك ... تنسى كل حاجة ممكن يكون عملهالك ... و تبدا كل حاجة وحشة فيه تطلع ... و مش كده و بس ده كمان الحاجات الكويسة اللى كنت بتتحاكى عنها تتقلب بقدرة قادر للنقيض و تكون نفس الحاجات اللى بتنتقدها ... لا و ممكن كمان تنتقد نفسك انك ازاى قعدت طول المدة دى من غير ما تعرفه على حقيقته .... مش عارف ليه

5- التعبير عن الحزن مش ممكن ابدا يكون جحود ... المشاعر لا يمكن ان تحجم او تقيد ... لكن ممكن تتعدل لو كانت سلبية بمعنى ... ان ساعات الواحد بيزعل من حاجة حصلت و بعدين يسال نفسه انا ايه اللى زعلنى من الموقف ده ... و ميلاقيش اجابة ... و يستغرب انه زعل .... لكن فى الاخر ده هو الاحساس اللى حس بيه ... لكن ممكن يفهم انه مكانش لازم يحصله كده ... ممكن الكلام ميبقاش واضح شوية ... هنشوف .. بس فى الاول و الاخر الشعور بالحزن موجود و طبيعى و الرسول صلى الله عليه و سلم فرح و حزن و غضب و ......

نكمل :
6- دى بقى ليها الف سبب و سبب ... فى ناس دايما تحب تحسسك انها اكتر ناس فى الدنيا عندها مشاكل و انك مهما كان عندك مشاكل مش ممكن تحس بهمومها و مشاكلها التى يعجز البشر مجتمعين ان يستحملوها .. و دول حلهم انك تنهى الحوار معاهم باسرع ما يمكن يعنى مجرد انه يقول كويس و بس و يتنهد تنهيدتين ترد تقول الحمد لله على كل حال وهس ..... و فى ناس تانية بتبقى دى عبارة عن مشاعر صادقة .. انت شخص يثق فيك و عنده مشكلة و هم و هو بين ان يحكى و يفضفض و بين انه يسكت و ميزودش همك ... و ده لازم تقف جنبه و تتكلم معاه خصوصا لو يهمك امره ... و فى ناس متعرفش ان كانوا خايفين من الحسد ام انه اصبح طبع فيهم ان يمثل الحزن و الهم ودايما حتى لو كان قبلها بخمس دقايق بيضحك و يزقطط يشوفك يعمل متنكد و الناس دى انا بتخنق منها شخصيا ... باحس انه عايش حياته فى تمثيلية من تاليفه و اخراجه و تمثيله و كمان بيجبرك تتفرج عليها كل يوم ... طبعا الفارق بين كل دول احساسك بالشخص .. و انت اكييد ممكن تفرق بينهم بسهولة

7- هى سبعة و تمانية و تسعة ... مبنقولش الحقيقة لاننا اتربينا على كده ... لما تقول الحق تلاقى ميت واحد يقولك عيب .. متغلطش ..و تلاقى ميت واحد يخرسك.. و لما تقول الف كلمة حلوة لواحد ميستحقش و لا كلمة منهم تلاقى الناس كلها فرحانة .... شىء غريب ... و كأن الناس عايزة اللى يكدب عليهم و ينافقهم و هم عارفين ان كلامك مش خارج من القلب ... و كان لمة الحق بتعريهم ... اتربينا على كده .. و كل يوم بنزود الحكاية ... و بنكبر و تكبر المجاملات الزائفة و الكلمات المعسولة التى بتخرج منها و مع كل كلمة بتتقال بتفقد جزء من احترامك لراغيك و لفكرك و لنفسك ...
اما حكاية اننا بنخدع نفسنا و نكدب على نفسنا ... دى بقى كارثة تانية لان انا شايف ان لو ان الواحد خدع الناس كلها مش ممكن يخدع نفسه و ان حاول و قدر يلهى نفسه عن التفكير فى الحقيقة .. هييجى عليه يوم يلعن نفسه و يلعن كل يوم عاش فيه فى كدبته لانك مهما كدبت على الناس مش هتقدر تكدب على واحد شايفك و عارفك و داخل جواك ... زائد انك ممكن تلاقى الف مبرر انك تخدع الناس بس مش ممكن تلاقى مبرر واحد علشان تكدب على نفسك الا لو كنت غبى ........

يا رب اكون قدرت اجاوب على الف ليه و ليه .... بس بجد استمتعت و انا باجاوب ... و يا رب اكون كتبت حاجة ليها قيمة ... بس حتى لو مكنش ليها قيمة كفاية انى خرجت كلام كان محبوس .. و ده لوحده له قيمة كبيرة عندى ... عارف انى طولت اوى ... اسف للتطويل ...

دمتم بفهم

اولا بجد احب اشكرك جدا

علي ردودك الجاده جدا واللي عجبتني جدا
واللي بسطني اوووووووي ان في حد لسه
عايز يتناقش او يقول رايه فحاجه بجد
ومش بس نعد نتكلم كلام كده وبس لا انت اثبتلي ان في فعل و
شكرا علي تفاعلك ده جداااااااااااااااااااااا ولي عوده هنا عشان اعلق واكمل الموضوع
وصح انت استغربت ان محدش رد بس عادي
يكفيني شرفا انك اهتميت ورديت وطلعت اللي جواك
شكرا يابرنس