معملتش دماغ قبل كده ؟؟؟

بسم الله الرحمن الرحيم
**********************
**********************
معملتش (دماغ ) قبل كده ؟ ..

بس المرة دى مش اي دماغ دي اسمها
( دمــــــــاغ نـــاس )
ايـــــه دماغ ناس دى ..

- دماغ ناس.. زى دماغ قهوه .. دماغ لب وسودانى .. تعمل دماغ " ناس"..
بص ياCD ..

لو فى يوم لقيت نفسك متضايق ومخنوق وملكش نفس تكلّم حد ومش لاقى حاجه تعملها ..
إنزل الشارع إتمشى لواحدك و تأمّل فى الناس ..
هتلاقى الموضوع مسلّى جداَ ..
الشعب المصرى ده لذيذ طحن ..
دماااااااااااااااااغ

......

* هتلاقى ناس طالع عين أهلهم فى أتوبيس فيه 186 واحد والناس طالعين من الشبابيك والجو حر ..
والناس لسّه بتركب وهى مبتسمه وحاسه بالكفاح ..
وتلاقى واحده ست تخينه – غالباَ موظفة – دخلت وسط الـ 120 واحد اللى واقفين على الباب واخترقت الجموع فى براعة ورشاقة تحسد عليها ..
سبحان الله

* واحد ومراته - كبار فى السن – ماشيين على الكورنيش بياكلوا ترمس فى منتهى السعادة والأمتنان ومش عايزين حاجه تانيه من الدنيا ..

* واحد شكله تعبان طحن ومش لاقى ياكل، بس جايب أحدث " الموبايل " وبيتكلم فيه بصوت عالى فى وسط الشارع..
عشان هو حر ..

* واحد عمره ما شاف الزبدة فى حياته ولا يعرف بتستخدم فى أيه أساساَ ..
عاملين معاه لقاء فى القناة الثالثة بيسألوه عن رأيه في مقاطعه المنتجات الدنماركية ..
قلهم " أه طبعاَ انا مع المقاطعه دا واجب وطنى يا جماعه أنتوا بتتكلموا إزاى .. "

* واحد واقف مع خطيبته/صحبته قدام قفص الأسود فى جنينه الحيوانات
بيقولها : " بصى .. أهو ده بقى الأسد.. !!! " شاعراَ بأنه قد منحها العلم والمعرفه المطلقة وأسرار الكون ..

* أسره مكونه من 4 أفراد أب وأم وبنت شابه وولد فى أعدادى قاعدين فى Café .. طلبوا عصاير وشيشتين .. مين اللى شرب الشيش ؟! .. البنت وأمها .. حاجه تغيظ... !!

* الموسم الي فات كان فى ماتش للأهلى و فريق تانى اسمة البطاطس التونسى .. كان فيه 2 منقبات بيشجعوا فى المدرجات !! .. و واحده منهم كانت لابسه نقاب أحمر .. تشجيع بقى .. صباح التهييس ..

جرب أنت كمان تعمل دماغ ناس ..
هتلاقى الموضوع مسلّى جداَ .. و أبقى قلنا إيه رأيك ..

رمضان كريم

ههههههههههههههههه
والله دى تكون دماغ عاليه اوى اوى اوى
ممكن نجربها
اساسا الشعب المصرى بجد بجد
شعب مسلى زى منتا بتقول

موضوع لذيذ ودماغ لذيذه

هههههههههههههههه
موضوع زي العسل يا أيمن
فعلا موضوعك عملي دماغ دلوقتي

شكرا لمشالي ومشمشه علي الردود دي

بجد نورتوا الموضوع

رمضان كريم

لا والله فعلا احنا كشعب في حد ذاتنا كده
مش دماغ
احنا اسطووووووووووورة

تبقي بتصلي التراويح في المسجد وفجاة تلاقي السيدات ابوا الصلاة وقعدوا يجيبوا في سيرة بعض
تبقي لسه طالع من الصلاة وبدل متختم الصلاة وتقول الاذكار تلاقي خناقة لرب السما
تبقي مثلا موظف بتقبض في الشهر ولنفرض0 100 جنيه كل الدخل
تلاقي نفسك بتصرف يا عينى تلات اضعاف المرتب ده ومتعرفش هتجيبهم منين

بس فعلا احنا شعب اسطووووووووووووورة

ههههههههههههههههه

شكرا يا ساره لمشاركتك

رمضان كريم

اكتر من كده دماغ .... ده احنا بقينا فى السحاب يا ايمن

يا دماااااااااااغك

شكرا يا ايمن على الدماغ دى

موضوع هاااااااااااااااااااااااايل ..

بس ع فكره فعلا لو الواحد حس بشويه زعل كده..مفيش احلى من انه يعمله دماغ
بس مش اى دماغ ..احلى حاجه انه يروح الكورنيش ويقعد يتفرج ع الناس ...بجد متعه تانيه
وسعتها هيلاقى نفسه فعلا ربنا اعطاله اللى مش اعطاه لحد..
وبجد هيعمل دماغ حلووووووووووووووووووه...وشكرا ع الموضوع الدماغ

ههههههههههههههههههههههههههههه
والله موضوع اخـــــــــــــــــــــــــــــــــــــــر روشنه
ههههههههههههههههههههههه

خلى الدماغ صاحى صاحى صاحى على رأى الاستاذ الكبير شعبان عبد الكريم

ههههههههههه

شكرا ل ....
عمر عمار
جنه
Pinkish"white

شكرا علي ردودكم وبجد نورتوا الموضوع

رمضان كريم

موضوع حلو يا ايمن
وفعلا الشعب المصرى تقدر تعمل عليه دماغ زى الفل

يعنى مثلا يوم ماتش الاهلى و النجم الساحلى بتاع 3/1
كل الاهلاوية خارجين من الماتش منهارين ولقوا واحده بتقولهم

متزعلوش يا ولاد ان شاء الله هنكسبهم فى العوده
وده طبعا كان آخر ماتش فى البطولة

شكرا يا ايمن باشا على الموضوع

ههههههههههه

جامده يا يمن

احنا شعب حكايه مالوش حل

IMI
Harry potter

شكرا لمروركم

رمضان كريم