مسرحية لمدرسين الرياضة

[center]شبه المنحرف للدائرة : من فضلك ياأنسة ، أنا طالب القرب .

الدائرة : حدد ألفاظك لو سمحت ، يعني ايه طالب القرب .

شبه المنحرف : قصدي يعني طالب التماس .

الدائرة : طيب روح قابل بابا ، أنا مابتكلمش مع حد .

شبه المنحرف : طيب ممكن اعرف العنوان ؟

الدائرة : أيوه ، آخر الطريق الدائري ، أول دوران على ايدك اليمين ، هتلاقي الدوار بتاعنا هناك .

شبه المنحرف: خلاص بكرة هكون عندكو الساعة 5 تمام .

الدائرة : كويس خالص عشان انا بحب الرقم 5 دا قوي ، طبعا انت عارف ليه ، هخلي بابا يستناك .

في المنزل

الاب يرحب بشبه المنحرف : أهلا وسهلا يابني ، ياترى ممكن أتعرف باسمك ؟

شبه المنحرف : شبه المنحرف يافندم .

الاب : انت اتجننت ياأفندي ، هي بنات الناس لعبة ؟ اسمك شبه المنحرف وجاي تخطب بنتي .

شبه المنحرف : فيه ايه بس ياعمي ؟ انا قلت حاجة غلط ؟

الاب : طبعا ، انهاردة شبه منحرف بكرة هتبقى منحرف ، وأنا لايمكن اجوز بنتي لواحد منحرف .

شبه المنحرف : ههههه ، لا ياعمي ، اطمن ، دا مجرد اسم ، انما أنا كل أضلاعي مستقيمة والحمدلله ، وكمان عندي ضلعين متوازيين .

الاب : طب ومالك واقف معووج كدا يابني ؟

شبه المنحرف : لا ، أبدا ، أصل انا مش متساوي الساقين .

الاب : ودا من ايه بقى ؟ حادثة دي ولا ايه ؟

شبه المنحرف : ههههههههه ، الله يضحكك ياعمي ، لا لا ، في الحقيقة دي طبيعة عيلتنا ، لكن فيه بعض أفراد مننا ربنا بيكرمهم وبتطلع سيقانهم متساوية ، هنقول ايه ، نصيب بقى .

الاب : طيب عندك مؤهلات تانية يابني ؟

شبه المنحرف : ماظنش ياعمي ، أنا قلت لك كدا كل حاجة عني ، شكلك كدا مش موافق علي .

الاب : لا أبدا يابني ، احنا بنشتري شكل هندسي ، بس اديني فرصة أفكر .

شبه المنحرف : براحتك ياعمي ، بس ماتتأخرش علي ، سلام عليكو .

فيما بعد تنظر الدائرة من الشباك فتخاطب والدها قائلة : بابا ، بابا ، أنا شايفة من الشباك واحد طول بعرض جاي ناحية بيتنا .

الأب : واحد طول بعرض ؟ أما نشوف يطلع مين دا كمان .

صوت طرقات على الباب ثم يدخل المستطيل فيخاطب الأب : مساء الخير ، أقدم لك نقسي ياعمي ، أنا المستطيل من عيلة الأشكال الرباعية اللي على أول الشارع .

الأب : أهلا بيك يامستطيل يابني ، دا لسة واحد من عيليتكو ماشي دلوقت ، وكان فيه شبه كبير منك .

المستطيل : لا ، لا ، أعوذ بالله ، دا أمثاله شبهة لعيلتنا ، دا جاب لنا العار من يوم مابقى عنده ضلعين مش متوازيين .

الاب : ماتتفضل تقعد يابني .

المستطيل : لا ، ماقدرش ياعمي ، أنا لازم افضل قايم على حيلي كدا عشان الزوايا بتاعتي كلها قايمة .

الاب : ياسلام ، دي حاجة كويسة قوي .

المستطيل : لا وإيه ، كل ضلعين متقابلين عندي متوازيين ومتساويين .

الأب : كمان ؟

المستطيل : والقطرين بينصفوا بعض ، بس اهم حاجة زي ماقلت لحضرتك ان انا الشكل الوحيد اللي زواياه الأربعة قائمة .

الاب : آه يانصاب يااونطجي ، انت فاكرني مش فاهم حاجة في الرياضيات ؟ دا أنا كنت بجيب خمسة ونص من عشرة في امتحان الرياضيات ، وعارف ان فيه شكل تاني غيرك عنده أربع زوايا قايمة .

المستطيل : ههههههه ، آه ، أكيد تقصد المربع ، لا ، لا ، دا يعتبر حالة خاصة مني ، يعني تقدر تقول كدا ان أنا الأب الروحي بتاعه .

الأب : الأب الروحي بتاعه ؟ هو انت كنت متجوز قبل كدا ولا ايه ؟

المستطيل : لا ياعمي ، ماتفهمنيش غلط ، كل الحكاية ان المربع هو مستطيل بس متساوي الاضلاع ، يعني طوله قد عرضه ، هههههههه ، شفت بقى الحكاية بسيطة ازاي ؟

الاب : طيب يابني ، احنا تشرفنا بيك ، بس اديني فرصة افكر .

المستطيل : براحتك ياعمي ، بس ماتتأخرش علي ، سلام عليكو .

صوت طرقات على الباب فتذهب البنت لتفتح ثم تعود .

البنت : بابا ، فيه واحد معين عاوز يقابلك .

الاب : يطلع مين يابنتي الواحد المعين ده ؟

البنت : أنا عارفة ؟ بيقول لي قولي لبابا فيه واحد معين عاوز يقابلك .

الاب : يابنتي ، ماهو أي حد في الدنيا بيبقى واحد معين ، انتي هتجننيني ؟ دا ايه الهبل اللي انت فيه ده ؟ أنا عارف جايين يخطبوكي على ايه ؟ هما انتصوا في نظرهم ؟ ماعلينا ، خليه يدخل أما نشوفه عاوز ايه دا كمان .

يدخل المعين فيخاطب الأب : أنا بقى ياعمي مش هتلاقي احسن مني لبنتك ، سيبك بقى من البتاع المنحرف ده والمستطيل اللي متشنج عالفاضي ، آل ايه ، مابيعرفش يقعد عشان زواياه قايمة ، دا قصر ديل ده ، أنا بقى اللي فيهم ، أميل يمين ، اميل شمال ، ماحدش قدي .

الاب : طب وايه تاني يابني ؟

المعين : عندي كل زاويتين متقابلتين متساويتين ، وأقطاري بتنصف بعضها ومتعامدين على بعض كمان ، أظن جديدة حكاية تعامد الاقطار على بعض دي ؟ يجننوا وهما متعامدين ، مش كدا ؟ وغير كدا ، أضلاعي كلها متساوية ، صدقني ياعمي أنا الوحيد اللي هيقدر يسعد بنتك ، دا كفاية جوز بنتك يبقى معين ، هو حد لاقي تعيين اليومين دول ؟

الأب : عندك حق يابني ، بس اديني فرصة افكر .

المعين : براحتك ياعمي ، بس ماتتأخرش علي ، سلام عليكو .

بعد قليل يسمع الأب صوت ضوضاء فيسأل البنت : ابه يابنتي الدوشة الل بره دي ؟

الدائرة : دي مزيكة حسب الله يابابا بتضرب سلام مربع ، ياترى فيه ايه ؟

الاب : سلام مربع ؟ ياترى مين اللي جاي دا ؟

صوت طرقات على الباب ثم يدخل المربع .
مساء الخير ياعمي .

الاب : اهلا يابني .

المربع : بقى شوف بقى ياعمي من الآخر كدا ، من الآخر ، أنا واد خلاصة لاصة ومية مية .

الاب : احنا هنقلبها مغنى ولا ايه ؟ ماعلينا ، ايه المناسبة انك خلاصة يعني ؟

المربع : انا عاوزك ياعمي تنسى كل اللي سمعته من الاشكال الثانية ، امسحه باستيكة .

الأب : ياساتر ، ليه يابني بتجيب سيرة الاستيكة ؟ مانت عارف انها عدوتنا كلنا ، دي بتنزل علينا تبهدلنا ، وخصوصا في التمارين اللي الطالبات بيعملوا فيها عمل ، تلاقي الطالبة من دول ترسم العمل وبعدين تمسحه ، وبعدين ترسم عمل تاني وتمسحه ، والتمرين مش محتاج عمل من أساسه .

المربع : ماعلينا ياعمي ، العمل عمل ربنا ، بس أنا هسأل سؤال واحد ، ايه اللي انت سمعته قبل كدا ومش موجود في ؟ زوايا قائمة وموجودة ، أضلاع متساوية فيه ، أقطار بتنصف بعضها ومتعامدة على بعض ، متوفر ولله الحمد ، كل ضلعين متقابلين متوازيين ، فيه اب يتمنى اكتر من كدا لبنته ؟ يعني متهيأ لي نقرا الفاتحة ونتوكل على الله ، هات ايدك .

الأب : لا استنى يابني ، لازم ناخد رأي العروسة الأول ، دورية ، يادورية ، تعالي يابنتي .

المربع : هي اسمها دايرة ولا دورية ياعمي ؟

الاب : هي في شهادة الميلاد اسمها "دائرة" لكن المدرسين والطلبة بيسموها "دايرة" أما في البيت فاسمها "دورية" ، بنت بقى وعاوزة تتدلع ، ههههههههه .

تدخل الدائرة ، وماان يراها المربع حتى يصرخ : يانهار اسود ، هي دي العروسة ؟

الاب : ايوه يابني ، فيه ايه ؟

المربع : دي ، دي ، دي مافيهاش ولا ضلع واحد يوحد ربنا .

الاب : ايوه ، ماهي طول عمرها كدا يابني ، هي عبارة عن شوية نقط على ابعاد متساوية من المركز ، هتجيب الاضلاع منين بس ؟

المربع : آه ، انتو شكلكو كدا عيلة بتحبوا اللف والدوران ، دا انتو مافيش عندكو حاجة مستقيمة خالص ، دا الدايرة من دول لما يرسموا جواها مستقيم بيقطع المحيط تعملوا فرح وتسموه "وتر" ، آل وتر آل ، وآل ايه لو رسمنا خط في منتصف الوتر وعمودي عليه يمر بمركز الدايرة ، تقولش هيمر بمركز طنطا ياخي .

الاب : لا ، اقف عند حدك ، بنتي اللي مش عاجباك دي ممكن تطبق جواها عشرين واحد من أمثالك لو حطيتو راسكو عالمحيط بتاعها تطبقوا كلكو ، فاهم ولا لأ ؟

المربع : انتو شكلكو عيلة معقدة ، المحيط 2 ط نق والمساحة ط نق تربيع ، تطلع ايه نق دي ؟؟ هه ، رد علي ، ولا "ط" دي كمان ، مرة ب 22 على 7 ومرة 3.14 ، شوف البساطة بتاعتي ، المحيط الضلع في اربعة والمساحة الضلع في نفسه ، حرام عليكو ، 2 ط نق إيه ؟ دا البنات بتوع اعدادي مش حافظين جدول الضرب أساسا ، وتقول لي 2 ط نق ؟

الاب : انا بحذرك ، انت شفت فيلم دائرة الانتقام بتاع نور الشريف ؟

المربع : أيوه شفته .

الأب : أهه انا بقى اللي كنت بمثل دور دائرة الانتقام في الفيلم ، انت مش قدي .

المربع : ياعم ، دا العمر واحد والرب واحد ، أنا هرجع لعيلتي واخواتي تاني ، بعد مالدائرة وقعت بيننا ، سامحوني ياخواتي ، سامحني ياشوشو (شبه المنحرف)، سامحني ياميسو (المستطيل) ، سامحني يامعمع (المعين) ، دانتو حبايبي ، منك لله يادايرة ، منك لله ، منك لله .

ولاتحرموني من ردودكم

منقوووووووووول

هههههههههههههههههههههههه

جامده ما لهاش حل

هايله يا بنكش المسرحيه دى