هذا الموضوع ليس منقولا من اي منتدى عربي او اجنبي ووضعت فيه خلاصة خبرتي وجهدي فلا يجوز نقل الموضوع او جزء منه او فكرته او حتى التحوير أوالتبديل الى اي منتدى او موقع اخر او كتابا الكتروني او اي وسيلة مهما كانت
ومن يفعل ذلك فإني شاكيه الى الله يوم لا ينفع مال ولا بنون
هناك امور في غاية الاهمية يجب فهمها قبل ان نبدأ
وسوف نقسم تلك النقاط طبقا لفهم حضرتك واقتناعك بالموضوع
اولاً..... عضو فاهم الموضوع وعارفه ومقتنع لانه فعلا حقق ارباح ويريد المزيد
نقول له
لا تكمل قراءة الموضع واذهب الى هنا
ثانيا ......عضو مش فاهم بس حابب يفهم الحكاية ايه ؟ وازاي ؟
نقول له وبالله التوفيق
من حقك تسأل اي سؤال وان شاء الله سنرد عليك
الموضوع يا عزيزي بمنتهى البساطة كما يلي
انت طبعا بتشوف اعلانات التلفزيون ولكنك بتشوفها وانت قاعد في البيت وببلاش
وبعد ما تشوف الاعلان يا اما يعجبك المنتج اللي في الاعلان وتشتريه يا اما ما تشتريهوش
طيب الاعلان ده ببلاش والا بفلوس ومين اللي بيدفع لمين ومين المستفيد ؟
اقول لك
الاعلان ده بفلوس وكل ما يتعرض على ناس اكتر بيدفع عليه فلوس اكتر
يعني الاعلانات اللي بتبقى قبل ماتش الكورة بتكون اغلى لان ناس كتير ح تشوفها
هنا نقول ان الشركة المنتجة هي اللي بتدفع الفوس واللي بيقبضها التلفزيون
وحكايتنا وموضوعنا زي اللي حكيته لحضرتك بالظبط ولكن على الانترنت
ازاي ؟؟؟؟؟
فيه شركات بتنتج اشياء كثيرة تخص الكمبيوتر والانترنت فبيكون احسن مجال لتسويق منتجاتها هو الانترنت صح ؟ لانه بيعرض منتجاته على الفئة اللي هو عاوزها
وكذلك فيه شركات مش بتبيع منتجات ولكن بتقدم خدمات فبتعلن عن خدماتها برضه للناس اللي هي بتستهدفهم اللي هما بخشوا على الانترنت يبقى ح تعرض خدماتها وتعلن عنها في احسن وافضل مكان ليها ... وهو الانترنت
يبقى كده وصلنا ان فيه جهات كتيرة محتاجة تعرض اعلاناتها على ومستخدمي الانترنت
صح الكلام ؟؟؟
طيب لكن احنا على الانترنت ما بنبصش على اعلانات وما بتعبرهاش ومش في دماغنا
صح ؟؟؟؟؟؟؟؟؟؟؟؟؟؟
آه ... هنا بدأ موضوعنا
علشان الناس تبص على الاعلانات اصبح فيه شركات متخصصة لنشر تلك الاعلانات
وعلشان حضرتك تشوف الاعلانات لازم يكون فيه حافز... وطبعا احسن حافز وصلوا اليه هو انهم يعطوك مبلغ بسيط وزهيد جداً على كل اعلان حضرتك ح تشوفه
حضرتك الوقت بتقول... كلام ايه ده ؟ مبلغ زهيد واعلان اشوفه؟ طيب ح اشوفه فين؟ والمبلغ ده كام بالظبط ؟وح استلمه ازاي ؟والحكاية تستاهل وجع الراس ده والا لأ ؟
اقول لك ... حاااااضر طول بالك معايا كمان شوية و ح تفهم كل حاجة وان شاء الله ح تفرح وتنبسط
شركات الدعاية اللي قلت لك عليها عاملة مواقع على الانترنت و وبنسميها
الشركات الربحية المجانية..............احفظ هذه التسمية ولا تنساها
وكلمة مجانية يعني حضرتك ممكن تسجل فيها مجانا... وبعد ما تسجل تدخل الموقع ح تلاقي روابط ( لينكات ) اول ما تضغط على اي لينك منهم يطلع لك اعلان وعليه عداد ثواني بيعد عد تنازلي واما يخلص العد ح تلاقي كلمة ( DONE ) يعني خلاص المبلغ اتحسب لك والاعلان ممكن مدته تكون عشر ثوان او عشرين اول ثلاثون او اربعون ثانية
ولكن الشائع والغالب بتكون المدة ثلاثون ثانية
وعدد الاعلانات بيختلف من شركة ربحية الى شكرة اخرى ففيه شركات عندها 7 اعلانات وفيه شركات عندها عشرين
ولكن الشائع والغالب في حدود عشرة اعلانات
وقيمة الاعلان تختلف من شركة الى اخرى وتتراوح ما بين واحد على عشرة من السنت( السنت واحد على مائة من الدولار ) الى نصف سنت الى سنت الى خمسة سنت الى 8 سنت عن كل اعلان تتصفحه
لكن الغالب والشائع هو سنت واحد عن كل اعلان ( طالما انك عضو مجاني )
وفيه صفحة في الشركة (الموقع ) بتوضح رصيدك وكام اعلان شفته
علشان تسحب فلوسك فيه شروط بتختلف من شركة لشركة والشروط دي سهلة
مثلا
تلاقي شركة بتشترط انها مش ح تديك فلوس الا لما توصل لدولار
وشركة تانية تقول لما توصل لخمسة دولار وشركة تالتة تقول لما توصل 10 دولار وهكذا
ولكن الشائع والغالب عشرة دولار
اذن عند وصول مبلغك الى العشرة دولار وهو حد التحويل يبقى ح يحولوا لك مبلغك
طيب ح يحولوا المبلغ على فين ؟
ح يحولوا المبلغ على حسابك في البنك الاكتروني اللي ح اشرح لك ازاي تفتحه في موضوع مستقل من الالف للياء وخلينا نكمل موضوعنا
حضرتك الوقت عاوز تسأل كام سؤال طيب انا ح اسأل واجاوب واعتبر نفسك ما سألتش
لان فيها اسئلة محرجة وان ح اعفيك من الحراج
عاوز تعرف ... هل انا عملت فلوس فعلا من الموضوع ده اقول لك نعم