اللى زيك و بيشتغل بالأجره
و اللى زيى و له ماهيه مسوجره
طول حياتنا نعرق على رغيف عيشنا
و النهارده مايفيضش حاجة لبكره
طول حياتنا نعرق على رغيف عيشنا
طول ما عشنا ماعمرناش حوشنا
المساكن و الأكل ناتفين ريشنا
و الملابس جايين لنا بالقدره
بعنا روحنا بالجمله و القطاعى
للشيطان و الخواجه و الاقطاعى
و اشترينا بصحتك و دراعى
يوم زياده برا القبور الغبره
يوم بيوم بالعرق كتبنا حياتنا
و كتبنا قصة حياة أبهاتنا
و قصىة الخلق كلهم اخواتنا
اللى شاربين كاساتنا قطره بقطره
ناس كتير فى البلد دى زيك و زيي
كلنا مولودين فى أحوال تعيي
القرف مشترك فى حيك و حيي
فى الحسين و الامام و غمره و شبرا
فى المحله و المنزله و بورسعيد
و بنى سويف و كفر شكر و رشيد
و البلاد البعيد فى آخر الصعيد
و البلاد اللى أرضها لسه صفرا
كنت باشرب عصير قصب من مده
و المعلم واقف قصاد العده
ينشف العود ده يلتفت للعود ده
شفت تفل العيدان تلول خدت عبره
شفت تفل القصب و شفت الزباين
اللى ممصوص و اللى جميع عضمه باين
كلنا مهلوكات عدد و مكاين
كلنا ممضوغين على ضبه فاجره